Bosh konsulning murojaati

Aziz do'stlar,

Sizga O‘zbekiston Respublikasining Bangkok shahridagi Bosh konsullik muassasasining veb-sahifasini taqdim etishdan mamnunman. Mazkur sahifani ishlab chiqsh jarayonida biz uning sodda va tushunarli bo‘lishiga e’tibor qaratib, unda Siz nafaqat Bosh konsullik muassasasi xizmatlari haqida, balki o'zbek-tay munosabatlaridagi muhim o'zgarishlar to‘g’risida kerakli ma'lumotlar bilan tanishishingiz uchun qulaylik yaratdik.

Shuni ta’kidlash joizki, yillar mobaynidagi serqirra sheriklik natijasida O‘zbekiston va Tailand uzoq muddatga mo‘ljallangan keng qamrovli hamkorlik kun tartibini ishlab chiqishga erishdi. Biz Tailand Qirolligi bilan savdo-iqtisodiy, sarmoyaviy va texnologik aloqalarni rivojlantirishga mo‘ljallangan “yo’l xaritasini” ishlab chiqdik.

Mamlakatlarimiz diniy ekstrimizm, radikalizm va terrorizm ko‘rinishidagi umumiy dushmanga qarshi kurashda hamjixatdir.

Qolaversa biz madaniy, ma’rifiy va akademik almashinuvlar orqali xalqlarimiz o‘rtasidagi aloqalarni mustahkamlashga intilmoqdamiz.

Bizning veb-sahifamizga tashrif buyurib, siz nafaqat turli masalalar bo'yicha foydali va dolzarb ma'lumotlarni topasiz, balki o‘zingiz uchun O‘zbekistonning kichik bir bo‘lagini kashf etasiz, deb umid qilaman.

Sahifamizga xush kelibsiz!

Aziz Aliev

O'zbekiston Respublikasining Bangkok shahridagi Bosh konsuli, BMTning Osiyo va Tinch okeani Iqtisodiy va ijtimoiy komissiyasining (ESKATO) doimiy vakili