O‘zbekiston Respublikasi Prezidenti Rossiya Federatsiyasi Prezidenti bilan telefon orqali muloqot qildi
O‘zbekiston Respublikasi Prezidenti Shavkat Mirziyoyev 2020-yil 7-may kuni Rossiya Federatsiyasi Prezidenti Vladimir Putin bilan telefon orqali muloqot qildi.
Suhbat avvalida davlat rahbarlari yaqinlashib kelayotgan bayram – fashizm ustidan qozonilgan G’alabaning 75 yilligi munosabati bilan bir-birlarini samimiy tabriklab, mamlakatlarimizning jasoratli faxriylariga, do‘st xalqlarimizga sog‘lik-omonlik va farovonlik tiladilar.
Urushda yelkama-elka kurashgan va front ortida fidokorona mehnat qilgan ota-bobolarimizning mardligi va qahramonligi avlodlarning minnatdor xotirasida abadiy qolishi alohida ta’kidlandi.
Muloqot chog‘ida O‘zbekiston va Rossiya Prezidentlari ikki tomonlama strategik sheriklik munosabatlarining dolzarb masalalarini ko‘rib chiqdilar.
Ko‘p qirrali hamkorlik, avvalo savdo-iqtisodiy sohada izchil rivojlanib borayotgani katta mamnuniyat bilan qayd etildi.
Jahon iqtisodiyotidagi murakkab vaziyatga qaramay, mamlakatlarimizning o‘zaro savdo hajmi ortib bormoqda. Sanoat, energetika, qishloq xo‘jaligi tarmoqlarida, transport soxasida, shuningdek infratuzilmani modernizatsiya qilish bo‘yicha muhim investitsiya loyihalari amalga oshirilmoqda.
Ikki mamlakat hududlari o‘rtasidagi kooperatsiya kuchaymoqda, madaniy-gumanitar almashinuvlar, fan va ta’lim, sog‘liqni saqlash va sport sohalaridagi hamkorlik kengaymoqda.
Prezidentlar bo‘lajak oliy darajadagi tadbirlarni puxta tayyorlash muhimligiga e’tibor qaratdilar. Global inqirozning salbiy oqibatlari iqtisodiy hamkorlik sur’atiga ta’sir ko‘rsatishiga yo‘l qo‘ymaslik maqsadida sa’y-harakatlarni yanada birlashtirish va oldindan chora ko‘rish muhimligi qayd etildi. Hukumat rahbarlari darajasida Qo‘shma komissiya va Hukumatlararo komissiya doirasidagi ishlar davom ettiriladi.
Muloqotda koronavirus infeksiyasi tarqalishi bilan bog‘liq vaziyat muhokama qilindi. Inqirozga qarshi kurashish, shu jumladan, aholiga manzilli yordam ko‘rsatish va ijtimoiy kafolatlarni kuchaytirish, biznesga har tomonlama ko‘maklashish, iqtisodiyotning asosiy tarmoqlarini qo‘llab-quvvatlash, cheklovlarni bosqichma-bosqich yumshatish borasida ikkala mamlakatda amalga oshirilayotgan chora-tadbirlar qo‘llab-quvvatlandi.
O‘zbekiston va Rossiya hukumatlari pandemiyaga qarshi samarali kurashish maqsadida sa’y-harakatlarni o‘zaro muvofiqlashtirib borishi va yaqindan hamkorlikni davom ettirishi muhimligi ta’kidlandi.
Davlat rahbarlari xalqaro va mintaqaviy ahamiyatga molik dolzarb masalalar yuzasidan ham fikr almashdilar.
Suhbat har doimgidek samimiy, ochiq va do‘stona ruhda o‘tdi.
O‘zbekiston Respublikasi Prezidentining rasmiy veb-sayti
