Oʻzbekiston hududlarida tadbirkorlik faoliyati birinchi chorakda oʻsishni koʻrsatdi – Iqtisodiy tadqiqotlar va islohotlar markazi

Oʻzbekiston hududlarida tadbirkorlik faoliyatining asosiy koʻrsatkichlari boʻyicha oʻtkazilgan kompleks monitoring barcha muhim mezonlar kesimida oʻsish kuzatilganini koʻrsatmoqda.

Toshkent, 24-aprel 2026y. Soliq va Bojxona qoʻmitalari, Markaziy bank hamda Respublika tovar-xom ashyo birjasining tezkor maʼlumotlariga koʻra, Iqtisodiy tadqiqotlar va islohotlar markazi Oʻzbekiston Respublikasi hududlarida tadbirkorlik faoliyatini monitoring qilib bormoqda.

Joriy yil mart oyi yakunlariga koʻra, soliq tushumlari oʻtgan yilning shu davriga nisbatan 54%ga oʻsib, barqaror ijobiy dinamikani namoyon etdi.

Eng katta oʻsish Navoiy, Sirdaryo, Toshkent va Xorazm viloyatlarida, shuningdek Toshkent shahrida qayd etildi, bu hududlarda oʻsish surʼatlari oʻrtacha 33%ni tashkil qildi.

Jismoniy shaxslardan olinadigan daromad soligʻi tushumlari 15,2%ga, mol-mulk soligʻi 10,7%ga, yer soligʻi esa 33,8%ga oshdi.

Bojxona toʻlovlari 19,5%ga oshdi. Eng yuqori oʻsish surʼatlari Navoiy viloyatida - 77,6%, Namangan viloyatida esa - 64,2%ni tashkil etdi.

Fargʻona va Samarqand viloyatlarida, shuningdek Qoraqalpogʻiston Respublikasida ham barqaror ijobiy dinamika qayd etildi, bu hududlarda tushumlar oʻrtacha 32%ga oshdi.

Tashqi iqtisodiy koʻrsatkichlar tahlili yakunlariga koʻra, tovarlar eksporti 30%ga oshdi. Eng yuqori oʻsish surʼatlari Navoiy viloyatida 71,4%, Toshkent viloyatida esa 52,4%ni tashkil etdi. Samarqand (30,6%ga), Namangan (29,3%ga) va Buxoro (27,2%ga) viloyatlarida ham oʻsish qayd etildi.

Shu bilan birga, kreditlash hajmida ham sezilarli oʻsish qayd etildi. Koʻrib chiqilgan davrda tijorat banklari tomonidan ajratilgan kreditlar hajmi 9,1%ga oshdi. Eng yuqori oʻsish Samarqand viloyatida 69,5%ni tashkil etdi. Buxoro, Xorazm, Fargʻona va Toshkent viloyatlarida esa kreditlashda oʻsish surʼatlari oʻrtacha 43%dan yuqori boʻldi.

Xususiy sektorning faol rivojlanishi yangi xoʻjalik yurituvchi subyektlar sonining sezilarli oshishi bilan tasdiqlanmoqda. Joriy yil mart oyida 22 443 ta yangi korxona roʻyxatdan oʻtkazildi. Eng koʻp yangi subyektlar Toshkent viloyatida (2 276 ta), Xorazm viloyatida (2 035 ta), Samarqand viloyatida (1 854 ta), Fargʻona viloyatida (1 626 ta) va Toshkent shahrida (4 759 ta) roʻyxatdan oʻtkazildi.

Oʻzbekiston Respublika tovar-xom ashyo birjasidagi bitimlar hajmi 20,8%ga oshdi. Birja faolligining eng yuqori oʻsishi Sirdaryo viloyatida qayd etildi, bu yerda faollik 68,4%ga oshdi. Shuningdek, Sirdaryo, Buxoro, Navoiy, Namangan, Surxondaryo viloyatlari va Toshkent shahrida ham oʻsish kuzatilib, oʻrtacha 33%ni tashkil etdi.

Sultonmurod Ozodov, 

Iqtisodiy tadqiqotlar va islohotlar markazi