Oʻzbekiston Prezidenti 9-10-oktyabr kunlari amaliy tashrif bilan Tojikistonda boʻladi

Oʻzbekiston Prezidenti Shavkat Mirziyoyev Tojikiston  Prezidenti Emomali Rahmonning taklifiga binoan 9-10-oktyabr kunlari amaliy tashrif bilan ushbu mamlakatda boʻladi.

Davlatimiz rahbari matbuot xizmati maʼlumotiga koʻra, Oʻzbekiston yetakchisi Dushanbe shahrida oʻtadigan “Markaziy Osiyo – Rossiya” formatidagi ikkinchi sammit va Mustaqil Davlatlar Hamdoʻstligi Davlat rahbarlari kengashining navbatdagi yigʻilishida ishtirok etadi.

Boʻlajak tadbirlar kun tartibidan koʻp qirrali hamkorlikni yanada kengaytirish, shu jumladan siyosiy muloqotni mustahkamlash, savdo-iqtisodiy va investitsiyaviy sohalarda qoʻshma loyihalarni ilgari surish, sanoat, qishloq xoʻjaligi, transport, energetika va infratuzilma sohalarida kooperatsiya qilish, faol madaniy-gumanitar almashinuvni davom ettirish masalalari oʻrin olgan.

Yetakchilar xalqaro kun tartibi va mintaqaviy xavfsizlikni taʼminlashning dolzarb jihatlarini ham muhokama qiladilar.

Sammitlar yakunida amaliy hamkorlikni yanada rivojlantirishga qaratilgan qator qoʻshma hujjatlar va qarorlar qabul qilinishi koʻzda tutilgan.

“Dunyo” AA